सिरहाको लहान नगरपालिका–१ मटियर्वामा डेरा गरी बस्दै आएकी एक महिला र उनका दुई छोराको मृत्यु भएको दर्दनाक घटना सार्वजनिक भएको छ।
लहान नगरपालिका–१२ की रन्जिता चौधरी डेरा लिएर लहान–१ मटियर्वामा बस्दै आएकी थिइन्।
गए मंगलबार दिउँसो उनी आफ्नै कोठामा झुन्डिएको अवस्थामा फेला परेकी थिइन्। सोही कोठामा उनका ५ वर्षीय छोरा एरोन चौधरीपनि मृत अवस्थामा भेटिएका थिए।
घटनास्थलमा भेटिएका ६ महिनाका अर्का छोरा गम्भीर अवस्थामा रहेकाले प्रहरीले तत्काल उद्धार गरी उपचारका लागि प्रादेशिक अस्पताल लहान पठाएको थियो। तर गए राति उपचारको क्रममा ६ महिनाका बालकको पनि मृत्यु भएको अस्पताल स्रोतले पुष्टि गरेको छ।
एकै परिवारका तीन जनाको मृत्युले लहान क्षेत्र स्तब्ध बनेको छ। प्रारम्भिक रुपमा आत्महत्या र बालकको हत्या जस्तो देखिए पनि घटनाको वास्तविक कारणबारे अनुसन्धान भइरहेको प्रहरीले जनाएको छ।
प्रहरी र स्थानीयले घटनास्थलको मुचुल्का उठाइसकेको र घटनासम्बन्धी थप विवरण संकलन भइरहेको जानकारी दिएका छन्।
मृतक रन्जिता चौधरीका श्रीमान प्रवीण चौधरी हालसम्म परिवारको सम्पर्कमा नरहेको बुझनमा आएकोछ।
