लहान, सिरहा ।
सिरहा जिल्लाको लहानमा हालै भएको चामल र चिनी लुटपाटपछिको शान्ति सुरक्षा स्थितिबारे गम्भीर चिन्ता व्यक्त गर्दै स्थानीय व्यापारी, समाजसेवी तथा युवाहरुले ईलाका प्रहरी कार्यालय लहानका डिएसपी कैलास राईसँग संयुक्त छलफल गरेका छन्। छलफलमा टोल स्तरमै सुरक्षा समिति गठन गर्ने र लुटपाटमा परेको सामग्री सम्बन्धित निकायमा बुझाउने विषयमा सहमति जुटेको छ।
जिल्ला उद्योग वाणिज्य संघ लहानका अध्यक्ष विकास सारडाको अगुवाइमा सम्पन्न उक्त छलफलमा समाजसेवी सन्तोष चौधरी, उमेश यादव, व्यवसायी डा. सुभाष बाबू साह, अशोक अमात्य, साथै वडा अध्यक्ष रामऔतार शर्मा लगायतका स्थानीय प्रतिनिधिहरूको उपस्थिति रहेको थियो।
उक्त बैठकले लहानमा पछिल्ला दिनहरूमा देखिएको असुरक्षा र अव्यवस्थालाई सम्बोधन गर्न स्थानीय समुदाय, व्यवसायी तथा सुरक्षाकर्मी बीच समन्वय आवश्यक रहेको निष्कर्ष निकालेको छ। डिएसपी राईले शान्ति सुरक्षा कायम गर्न प्रहरीले आवश्यक कदम चालिरहेको जानकारी गराउँदै, स्थानीय सहयोग बिना पूर्ण सुरक्षा सम्भव नरहेको बताए।
बैठकले टोल सुरक्षा समिति गठन गरेर समुदायमै सन्देहास्पद गतिविधिहरूको निगरानी गर्ने, प्रहरीसँग नियमित समन्वय गर्ने र आपतकालीन अवस्थामा सूचना आदानप्रदान गर्न सहज बनाउने विषयमा प्राथमिकता दिने निर्णय गरेको छ।
सुरक्षाको सवालमा सबै पक्ष एकजुट भई अघि बढ्नुपर्ने आवश्यकता महसुस गरिएको बैठकले लहानको शान्ति, स्थायित्व र व्यवसायिक वातावरणलाई सुरक्षित बनाउन साझा प्रयास गर्ने प्रतिबद्धता जनाएको छ।
