उच्च शिक्षालय तथा उच्च माध्यमिक विद्यालय संघ, नेपाल (HISSAN) को नवौं राष्ट्रिय महाधिवेशन काठमाडौँको बुढानिलकण्ठस्थित पार्क भिलेज रिसोर्टमा पौष ११ र १२ गते भव्य रूपमा सम्पन्न भएको छ। महाधिवेशन अन्तर्गत सम्पन्न निर्वाचनबाट काठमाडौँस्थित व्ह्वाइट हाउस कलेजका संस्थापक प्रिन्सिपल तथा शिक्षाविद् युवराज शर्माको अध्यक्षतामा नयाँ राष्ट्रिय कार्य समिति अत्यधिक बहुमतका साथ चयन भएको हो।
नव निर्वाचित कार्य समितिमा स्वागत श्रेष्ठ र टंकराज आचार्य वरिष्ठ उपाध्यक्षमा चयन भएका छन्। त्यसैगरी लहानस्थित लहान एभरेष्ट कलेजका संस्थापक एवं कलेज प्रमुख धरणीधर अधिकारीसहित ११ जना उपाध्यक्ष चयन भएका छन्। यससँगै ६३ सदस्यीय राष्ट्रिय कार्य समिति गठन भएको छ।
हिसानको इतिहासमै पहिलो पटक निर्वाचन प्रक्रियामार्फत यसरी राष्ट्रिय कार्य समिति चयन भएको हो, जसलाई संगठनको लोकतान्त्रिक अभ्यासतर्फको महत्वपूर्ण उपलब्धिका रूपमा हेरिएको छ।
मधेस प्रदेशबाट जनकपुरका बाबुसाहेब यादव र सञ्जिवकुमार ठाकुर तथा वीरगञ्जका मुकेशकुमार गुप्ता केन्द्रीय सदस्यमा निर्वाचित भएका छन्। साथै मधेस प्रदेशबाट एक मात्र सर्वसम्मत उम्मेदवारका रूपमा धरणीधर अधिकारी राष्ट्रिय उपाध्यक्षमा अत्यधिक मतका साथ निर्वाचित भएका छन्।
नव निर्वाचित सम्पूर्ण पदाधिकारी तथा सदस्यहरूलाई बधाई ज्ञापन गर्दै उहाँहरूको कार्यकाल सफल, प्रभावकारी र शिक्षाक्षेत्रको उन्नतिमा योगदानमूलक रहने विश्वास व्यक्त गरिएको छ।
