सिरहा । मिर्चैयामा अवस्थित सगरमाथा उच्च माध्यमिक विद्यालयको हल शनिबार बिहान मानिसहरूले भरिएको थियो । जसमा विद्यार्थीभन्दा धेरै अभिभावक थिए । किनकि, यो कार्यक्रम नै अभिभावक र समुदायका व्यक्तिहरूलाई लक्षित गरी आयोजना गरिएको थियो ।
कार्यक्रमको नाम थियो – सामुदायिक स्वास्थ्य तथा वेलनेस प्रेरणादायी कक्षा । अर्थात्, अहिलेको आधुनिक युगमा व्यस्तताका बावजुद पनि जीनव र स्वास्थ्यलाई कसरी व्यवस्थित एवं सन्तुलित बनाउने सम्बन्धि कार्यक्रम । यो कार्यक्रममा खासगरी योगका माध्यमले सहभागीहरूलाई स्वास्थ्य सचेतना दिइएको हो ।
कार्यक्रममा योग गुरु डा. लोभ अवस्थीले सहभागीहरू योग र ध्यान सिकाए । अधिकांश अभिभावक सहभागी रहेको यो कार्यक्रममा कक्षा ११ देखि स्नातक तहसम्मका विद्यार्थीलाई पनि बोलाइएको थियो । सगरमाथाले यसरी खासगरी अभिभावकलाई नै लक्षित गरेर गरेको यो कार्यक्रम पहिलो भने होइन ।
एक वर्षदेखि सगरमाथाले शिक्षालाई समुदायसँग जोड्ने उद्देश्यले यस्ता कार्यक्रम निरन्तर रूपमा गर्दै आएको छ । ‘यसअघिसम्म हामीले राम्रो विद्यार्थी उत्पादनका लागि विद्यार्थी, अभिभावक र विद्यालयको मात्रै भूमिका हुन्छ भनेर सोच्थ्यौं,’ सगरमाथाका सञ्चालक प्रदीपकुमार तिवारीले भने, ‘तर, यसरी मात्रै हुन्न भनेर हामीले महसुस गर्यौं, शिक्षालाई राम्रो बनाउन समाजमा राम्रो वातावरण पनि चाहिन्छ, यसका लागि सिंगो समुदायलाई शिक्षासँग जोड्नुपर्छ भन्ने निधो गर्यौं ।’
यस्ता सचेतनात्म र प्रेरणात्मक कार्यक्रमले समुदायका मानिसको जीवन, शरीर र मानसिक स्वास्थ्यलाई सन्तुलनमा राख्ने र यसैगरी अनुशासित तथा सकारात्मक सोंच भएको समाज निर्माण हुने तिवारीले बताए । ‘अहिले व्यस्तताको चक्करमा मान्छे आधारभूत आवश्यकताबाट टाढा छन्,’ उनले भने, ‘यस्ता कार्यक्रमले समुदायका मानिसको शारीरिक र मानसिक स्वास्थ्यलाई मात्र सन्तुलनमा राख्दैन, यसले समाजलाई अनुशासित र सकारात्मक दिशातर्फ डोर्याउँछ ।’
